A+ A-

சாஹோ : ஹிந்தி உரிமை 120 கோடி..!

'பாகுபலி' படத்தின் இரண்டு பாகங்கள் மூலம் இந்திய அளவில் புகழ் பெற்ற நடிகராக மாறினார் பிரபாஸ். அமெரிக்கா, ஜப்பான் உள்ளிட்ட நாடுகளிலும் இப்படத்திற்கு பெரிய வரவேற்பு கிடைத்தது. விரைவில் சீனா நாட்டில் வெளியிட ஏற்பாடுகள் நடந்து வருகின்றன.

'பாகுபலி 2' படத்திற்குப் பிறகு பிரபாஸ் 'சாஹோ' படத்தில் நடித்து வருகிறார். இப்படத்தை தமிழ், தெலுங்கு, ஹிந்தி ஆகிய மொழிகளில் எடுத்து வருகிறார்கள். கடந்த வருடம் ஜுன் மாதம் ஆரம்பமான இப்படத்தின் படப்பிடிப்பு மெதுவாகவே நடந்து வருகிறது. இந்த வருடக் கடைசி அல்லது அடுத்த வருடத் துவக்கத்தில் தான் படம் வெளியாகும் என்கிறார்.

'சாஹோ' படத்தின் ஹிந்தி உரிமையை தற்போது பிரபல நிறுவனமான டி சீரிஸ் நிறுவனம் வாங்கியுள்ளதாகத் தகவல் வெளியாகியுள்ளது. 120 கோடி ரூபாய்க்கு அந்த நிறுவனம் வாங்கியுள்ளதாம். படத்தின் மொத்த பட்ஜெட்டே 200 கோடிதான் என்கிறார்கள். அப்படியிருக்க அந்த நிறுவனம் அவ்வளவு தொகையைக் கொடுத்து ஹிந்தி உரிமையை வாங்கி ஆச்சரியப்படுத்தியுள்ளது. 500 கோடிக்கும் மேல் 'சாஹோ' படம் வசூலாகும் என்று எதிர்பார்க்கப்படுகிறது.