A+ A-

நடிகர் அர்ஜுன் என்னை அனுமதியின்றி தொட்டார்- நடிகை ஸ்ருதி

நடிகர் அர்ஜுன் மீது ‘நிபுணன்’ படத்தில் நடித்த நடிகை ஸ்ருதி ஹரிஹரன் பாலியல் குற்றச்சாட்டை வைத்துள்ளார். 
ஒரு காலக்கட்டத்தில் தமிழ் சினிமாவில் கொடிக்கட்டி பறந்தவர், நடிகர் அர்ஜுன். ஜென்டில்மேன், முதல்வன், ஏழுமலை என பல வெற்றிப்படங்களில் நடித்த அர்ஜுன், தெலுங்கு, கன்னடா என மொழிகளிலும் நடித்துள்ளார். 

சமீப காலமாக ஹீரோ கதாபாத்திரங்களை தவிர்த்து, குணச்சித்திர வேடங்களில் நடித்து வரும் அவர், அடுத்ததாக நடிகர் விஜய் ஆண்டனியுடன் இணைந்து ‘கொலைக்காரன்’ என்ற படத்தில் நடித்து வருகிறார். இந்நிலையில், சமீப காலமாக பெண்கள் மீதான பாலியல் துன்புறுத்தல்களை உலகிற்கு வெளிச்சம் போட்டு காட்டி வரும் #MeToo புகாரில் நடிகர் அர்ஜுனும் சிக்கியுள்ளார். 

நடிகர் அர்ஜுன் நடிப்பில் சென்ற ஆண்டு வெளியான ‘நிபுணன்’ படத்தில் நடித்த நடிகை ஸ்ருதி ஹரிஹரன், அர்ஜுன் தன்னிடம் தகாத முறையில் நடந்து கொண்டதாக கூறியுள்ளார். இதுகுறித்து அவர் வெளியிட்டுள்ள பதிவில், “விஸ்மயா (தமிழில் ‘நிபுணன்’) படத்தில் நடிகர் அர்ஜுனுக்கு மனைவியாக நடித்தபோது, நானும் அவரும் நெருங்கி நடிக்க வேண்டிய காட்சி ஒன்று இருந்தது. அந்தக் காட்சியை படமாக்குவதற்கு முன்பாக, படப்பிடிப்புத் தளத்தில் அனைவரது முன்னிலையிலும், அர்ஜுன் எனது அனுமதியின்றி என்னிடம் நெருக்கமாக வந்து என்னைத் தொட்டார். அது எனக்கு கோபத்தை உண்டாக்கியது” என தெரிவித்துள்ளார்.


ஏற்கனவே #MeToo புகார்களில் வைரமுத்து உள்ளிட்ட பிரபலங்கள் சிக்கியுள்ள நிலையில், அதில் அர்ஜுனும் சேர்ந்துள்ளது பலரை அதிர்ச்சியடைய செய்துள்ளது.