வைபவ், மீனாட்சி கோவிந்தராஜன் முதன்மை கதாபாத்திரங்களில் நடிக்கும் படம், ‘தத் த்வம் அஸி’. மலையாளத்தில் வரவேற்பைப் பெற்ற ‘மாளிகப்புரம்’ படத்தை இயக்கிய விஷ்ணு சசி சங்கர் இதை இயக்குகிறார். அரவிந்த் ஆகாஷ், ஆடுகளம் நரேன் உள்ளிட்ட பலர் முக்கிய கதாபாத்திரங்களில் நடிக்கின்றனர்.
இந்தப் படத்தை ஜேகே சரவணா மற்றும் ஜேகே சதீஷ் தயாரிக்கின்றனர். பிரேம் ஜி அமரன் இசை அமைக்கிறார். யுவன் செல்வா ஒளிப்பதிவு செய்யும் இப்படத்தின் படப்பிடிப்பு சென்னையில் தொடங்கியது. இயக்குநர் வெங்கட் பிரபு கிளாப் அடிக்க, பொன்ராம் கேமராவை ஆன் செய்து படக்குழுவை வாழ்த்தினார்.
“பக்தி, நம்பிக்கை, ஆன்மிக உணர்வுகளை மையமாகக் கொண்டு, அதனுடன் ஆக் ஷன் மற்றும் உணர்ச்சி கலந்த பொழுதுபோக்கு அம்சங்களுடன் இப்படம் உருவாகிறது. அனைத்து தரப்பினரையும் கவரும் வகையில் இப்படத்தின் திரைக்கதை வடிவமைக்கப்பட்டுள்ளது” என படக்குழு தெரிவித்துள்ளது. இந்த வருடம் ஐயப்ப மண்டல காலத்தை முன்னிட்டு படத்தை வெளியிடத் திட்டமிட்டுள்ளனர்.
